Kaparte san padayon nga panalinguha san Gobyerno Probinsyal nga makonekta an mga higrayo nga barangay, ginhimo an bag-o nga Farm-to-Market Road tikang Bgy. Salvacion pakadto sa Brgy. San Julian, sa bungto san Catarman.

An proyekto mayaon sin 775 meters nga kahilaba ngan kahilapad nga 6.10 meters. Ginkokomponer liwat ini sin clearing and grubbing kaupod an embankment ngan excavation, concreting o pagsemento san kalsada, pagbutang sin box culverts para san agihan san tubig, road shoulder ngan miscellaneous structures pareho san konkreto nga wheel guards.

An Brgy. San Julian in mayaon sin kahirayo nga maabot 20 kilometros tikang sa poblacion san Catarman ngan dati makuri maabot san sarakyan lain san habal-habal. Pinaagi san bag-o nga FMR, poyde na makabiyahe an mga truck o iba pa nga 4-wheeled vehicles tubtob sa katapusan san kalsada, hirani sa poblacion san barangay San Julian.

Tikang sa tubtuban san bag-o nga FMR, mayaon pa sin 600-700 kametro para makadiretso an kalsada sa poblacion san barangay San Julian. Ini an masunod nga igpoprograma san Gobyerno Probinsyal, kaupod san iba pa nga proyekto sa imprastraktura san probinsya. (ACT/JEJ)

#PadayonNgaKauswagan #NortehanonMarigonMainuswaganMalipayon #SustainedPROGRESS